Skopri min huma n-nies u l-komunitajiet lokali li hu mertu tagħhom li għandna akkwakultura b'saħħitha fl-UE. Uħud minnhom jgħixu stil ta’ ħajja li jmur lura sekli sħaħ. Sir af dwar il-ħidma tal-produtturi Ewropej li bejniethom tkopri l-kosta tal-Atlantiku, il-Baltiku, l-Ewropa Ċentrali, u madwar il-Baħar Mediterran.
Mali Ston Bay, magħrufa għall-gajdri tagħha, hija fejn joqgħod Vedran Kunica, li ilu president tal-assoċjazzjoni tal-produtturi lokali għal aktar minn għaxar snin.
Il-bdiewa hawnhekk ikabbru l-gajdri bil-mod tradizzjonali: fuq il-konzijiet f’fond ta’ bejn 8 metri u 15-il metru.
Il-gajdri hawnhekk mhux biss jikbru bl-abbundanza, iżda għandhom ukoll rwol vitali fil-filtrazzjoni tal-ilma b’mod naturali billi jikkonsmaw in-nutrijenti eċċessivi, il-fosforu, u n-nitroġenu.
Fil-qalba tar-Riżerva tal-Bijosfera ta’ Camargue fin-Nofsinhar ta’ Franza, Caroline Scotti ttrasformat il-passjoni tagħha fi proġett.
Caroline, li qabel kienet tekniku tal-laboratorju, issa tmexxi b’suċċess negozju tat-trobbija tal-maskli flimkien ma’ żewġha, Paul.
Flimkien, ikabbru bejn 20 u 35 tunnellata fis-sena, u jwasslu l-prodott direttament fis-swieq lokali biex jiżguraw il-kwalità u t-togħma eċċezzjonali tal-maskli tagħhom.
Lejn l-aħħar tas-snin 50, in-nannu ta’ Philipp Mohnen beda l-farm tat-troti bħala negozju tal-familja fi Stolberg-Schevenhütte qrib Kolonja.
Illum il-kumpanija, li tikkonsisti f’erba’ farms tal-ħut fiż-żona, imexxiha n-neputi tiegħu Philip.
Ibigħu trota friska u affumikata, kif ukoll ħut ħaj lil produtturi oħrajn madwar il-Ġermanja.
Fil-gżira Griega ta’ Evia, Anna Kaloumenou taħdem bħala maniġer tal-bejgħ fil-farm tal-ħut li kienu bdewh missierha u sieħbu.
Huma jipproduċu l-awrat u l-ispnott ’il barra mill-kosta tal-gżira, bl-użu ta’ programm speċjali ta’ għalf biex jitnaqqas l-iskart.
Il-kumpanija taħdem ħafna biex tipproteġi l-bijodiversità tal-baħar u l-ħabitat lokali.
Bence Puskás huwa d-deputat kap eżekuttiv ta’ farm tal-karpjuni f’Biharugra, fir-reġjun tal-Pjanura l-Kbira tan-Nofsinhar tal-Ungerija.
Il-ħut jitkabbar f’għadajjar restawrati u dan il-ħabitat kważi naturali jservi wkoll ta’ sostenn għall-organiżmi selvaġġi, inklużi diversi speċijiet protetti.
Dawn jipproduċu ħut ta’ kwalità għolja u bi prezzijiet tajbin li jiekol il-plankton u l-għelejjel lokali.
Fuq il-kosta Atlantika mbiegħda u sabiħa tal-Irlanda, Thomas Doherty huwa koproprjetarju ta’ farm tas-salamun organiku qrib Castlebar, fil-Kontea ta’ Mayo.
It-trobbija tal-ħut tippermetti lil Thomas u lill-ħbieb u l-ġirien tiegħu jibqgħu f’żona b’opportunitajiet limitati ta’ xogħol, u dan jippermetti lill-komunità lokali tirnexxi.
Massimo Genari huwa bidwi tal-gandoffli minn Goro, żona pittoreska fid-delta tax-Xmara Po fl-Italja.
Bħalissa huwa l-kap eżekuttiv tal-Consorzio di Pescatori di Goro, u beda jaħdem fl-akkwakultura meta kien għadu tifel jgħin lil missieru jaħsad il-gandoffli.
Il-bdiewa hawnhekk jużaw tekniki speċjali biex jiżguraw l-aħjar kundizzjonijiet naturali għall-prodott tagħhom.
Eduardo Soler Torres jaħdem għal Avramar, produttur ta’ ħut Mediterranju ta’ kwalità għolja.
Huwa inkarigat mill-prattiki li ma jagħmlux ħsara lill-ambjent ta’ Avramar.
Il-kumpanija tkabbar il-gurbell rar u tipi oħrajn ta’ ħut ’il barra mill-kosta ta’ El Campello, Spanja.
Il-bijologu tal-baħar Göran Nylund huwa kofundatur u riċerkatur fin-Nordic Sea Farm, li jinsab fi Grebbestad, qrib Gothenburg.
L-attività ewlenija tal-kumpanija hija t-tkabbir u l-ipproċessar tal-algi (il-laminarja zokkrija u l-ħass il-baħar), li jintużaw għall-ikel, għall-bijomaterjali, għall-għalf tal-annimali u l-fertilizzanti, kif ukoll mill-industrija farmaċewtika.
